VONZA KINA OMUNGENGA//UM PERIGO EMINENTE

VONZA KINA OMUNGENGA//UM PERIGO EMINENTE

A mbuta kingana betanga "Kilata nti Kialambuka kyakondua esina zevo o Nzambi kazeyekyo mpanga ko"
mulukufi ekingana kyokyo tulenda kyo bangulwila ne yi wawu: Konso leko kina okunsi a ntangwa kina ye tuku
Ovo yeto tugikwanga vo a Kongo,tuna ye matuku meto isiavo,omuntu yandi wonso una yeki muntu kyandi,una ye ndinga andi,una ye kisinsi kyandi.
E ndinga a ngutukilu ,yina kumbi yisunzulanga kimuntu kyandi, ovo nkangu ukondelo endinga angutukilu, okangu owowo wuna muna kiwayi, yovo wavila, kadi kana yi Nzambi tusambilanga, una Nzambi azi ndinga yo makanda.
Konso kanda divwidi ndinga andi Akongo bavwidi ndinga awu yi KIKONGO,ambundu KIMBUNDU, a ovimbundu bavwidi ndinga awu yi UMBUNDU ye bonso bonso.
Wau evonza  kina omungenga endinga zeto zangutukilu omu nsi eto zina vila, musungula endinga eto a Kikongo.

Omwisi Angola, wutatoma zitisa ndinga zakinzenza,kemundinga zayandi kibeni ko,muna zi mbanza,musungula omatoko ye ndumba,batomene zola vova ndinga zakinzenza bonso Kimputulukezo,Kingelezo,yovo Kifalansa,a kongo balutidi toma zola ovova e Dingala,kemukikongo ko.
Vena yo wana bawutukidi oku Angola akongo,batomene zaya ovova edingala kemukikongo ko, muna nzo za Nzambi, ntangu zayingi muna sambu,betoma zolanga osadila endinga a mputulukezo ye dingala,nkenda ye kiadi kwa musi Angola wutavilakana ekinkulu kyandi,wuta lwaka se nbundu muna dyambu ditadidi kinkulu kyandi,musungula kwa ngeye musi Kongo,yimukuma  nkumbu zayingi tubokelelwanga e nkumbu zina kezina ebetela yeki muntu kyeto ko.
Engi bebanzanga avo yandi olongokele ,nanga ovova endinga angutukila kunkatula luzitu kadi endinga eyoyo yina ndinga ya wantu bakondelo enzayilu. Yimukuma eki engi betoma longokanga endinga zanzenza (musungula za mindele) yovova zo kondwa kwa nsoni kadi oyandi wuna muntu atemoka kyongolo o gindu owowo watekama, yekewulendi twasa luvatumuku ko muna nsi.

Kevena ndinga yisundidi ndinga ankaka ko,ketulendi kala ye mpimpita ko mudiambu ditadidi ngangu zamvangilu "Técnologia" ye kisinsi ko.
Ambuta yawu vo,ongudi ke sobwanga ko; Kwayeto mase ye ngudi,yi dyeto muna lumbulwilanga owaneto,twabalonganga endinga zakisinsi,bazaya zo yovova zo kondwa kwa nsoni yo wonga,twalembi vingisa e ndinga zaki nzenza muna ndinga zeto.
Omundele yandi awonso, kalendi longoka ndinga akinzenza ko,avo kalembele zaya ntete e ndinga andi angutukilu ko.
Kyaku,kyaku;Kyangani,kyangani

Porto/Portugal,aos 15/03/2013

Por:Lufiauluisu Ferraz                                                        Facebook: Grupo Kongo